Feeds:
பதிவுகள்
பின்னூட்டங்கள்

Posts Tagged ‘GNB’

நான் எழுதிய பல கட்டுரைகள் எனக்கே தேவைப்படும் போது கிடைப்பதில்லை. முடிந்த போது கிடைப்பவற்றை இங்கே வெளியிட்டுத் தொகுத்துக் கொள்கிறேன். ஏற்கெனவே படித்தவர்கள் மீண்டும் படித்துத் துன்புற வேண்டாம் என்று கேட்டுக் கொள்ளப்படுகின்றனர்.

இன்று ஜி.என்.பி-யின் பிறந்த நாள். அதை சாக்காக வைத்து அவரைப் பற்றி பத்து வருடங்களுக்கு முன் எழுதிய கட்டுரையை வெளியிட்டுக் கொள்கிறேன். இந்தக் கட்டுரை பெற்ற எதிர்பாரா வரவேற்பே என்னை மேலும் எழுதவும், பின்னால் நூல் எழுதக் கூட செலுத்தியது எனலாம். அந்த வகையில் எனக்கு மிகவும் நெருக்கமான கட்டுரை. இப்போது படித்துப் பார்த்தால் கொஞ்சம் சுமாராகத்தான் இருக்கிறது என்றாலும் அதிகம் மாற்றாமல் சில தகவல் பிழைகளை மட்டும் நீக்கி வெளியிடுகிறேன். வாழ்க ஜி.என்.பி புகழ்.

cover_img-1

2006 செப்டம்பர் 24-ஆம் தேதி, கோவை அவினாசிலிங்கம் பல்கலைக்கழகத்தில் நிகழ்ந்த இசைக் கருத்தரங்கில் ஜி.என்.பி-யைப் பற்றி பேச ஒரு வாய்ப்புக் கிட்டியது. அக்கருத்தரங்கில் வெளியான ஆய்வுக் கோவையில் இக்கட்டுரை பதிப்பிக்கப்பட்டுள்ளது. டபுள் லைன் ஸ்பேசிங்கில் ஐந்து பக்கத்திற்கு மிகாமல் கட்டுரை இருக்க வேண்டியிருந்த்தால் பல விஷயங்களை மேலோட்டமாகவே இக்கட்டுரை தொடுகிறது. By no standards this could be considered a research article. Just an attempt to show the tip of the ice berg.

கர்நாடக இசைக் கச்சேரி முறையை தமிழுக்கு ஒப்பிட்டோமெனில், அரியக்குடி இராமானுஜ ஐயங்காரின் கச்சேரிகள் தொல்காப்பியத்திற்கிணையாகும். தொல்காப்பியம் படித்தவர் பலரிருப்பினும், காலத்தை கடந்து நிற்கும் வெண்பாக்களையும் விருத்தங்களையும் அகவல்களையும் படைத்திருப்பவர் சிலரே. அதே போல், அரியக்குடி இராமானுஜர் ஐயங்கார் அமைத்துக் கொடுத்த கச்சேரி முறையை பின்பற்றியவர் பலரெனினும், இசையுலகில் என்றுமழியாச் சுவடை விட்டுச் சென்றவர்கள் மிகச் சிலரே. அவர்களுள் முதன்மையாக விளங்குபவர் ‘ஜி.என்.பி’ என்று பரவலாய் அழைக்கப்பெற்ற கூடலூர் நாராயணசாமி பாலசுப்ரமணியம்.

ஜி.என்.பி என்னும் இசையுலக இளவரசரின் தோற்றம், ஜி.வி.நாராயணசாமி ஐயர் விசாலம் அம்மாள் தம்பதியினரின் வீட்டில், 1910-ஆம் வருடம் ஜனவரி 6-ஆம் நாள் நிகழ்ந்தது. பார்த்தசாரதி சங்கீத சபையின் காரியதரிசியாகவும் ம்யூசிக் அகாடமியின் ‘experts commitee’ உறுப்பினராகவும் பொறுப்பு வகித்த நாராயணசாமி ஐயரின் வீட்டில், கோனேரிராஜபுரம் வைத்தியநாத ஐயர், பல்லடம் சஞ்சீவ ராவ், பூச்சி ஸ்ரீநிவாஸ ஐயங்கார் போன்ற சங்கீத ஜாம்பவான்களின் கூட்டம் எப்பொழுதும் குழுமியிருக்கும். இச்சூழலில் வளர்ந்த ஜி.என்.பி-யின் மனம் சங்கீதத்தின்பால் ஈர்க்கப்பட்டதில் வியப்பொன்றுமில்லை

1957-ஆம் வருடம் வெளியான ‘My First Concert’ என்ற ஜி.என்.பி-யின் கட்டுரையில் (தமிழாக்கம் பின்வருமாறு), ” நான் பிறந்த நாள் முதல் எனைச் சுற்றியிருந்த சூழல் சங்கீத மயமாகவே இருந்தது. இதனால் எனது சங்கீத ஞானமும் அதன் பால் இருந்த ஈர்ப்பும் கிளைவிட்டு நாளுக்கு நாள் வளர்ந்தபடியிருந்தது. என் வீட்டிலிருந்தபடியே அற்புதமான சங்கீதத்தைக் கேட்கக்கூடிய வாய்ப்பு எனக்கு அமைந்திருந்தது. நல்ல சங்கீதத்தில் ஊறியதன் பயனாய் சஹானா, செஞ்சுருட்டி, பேகடா, சாவேரி போன்ற இராகங்களை பிழையின்றி பாட முடிந்தது. ஒரு குருவிடம் சென்று முறையாகப் பயிலாவிடினும் எனக்கு ஸ்வர ஞானம் சிறு வயதிலேயே கைக்கூடியது. இதற்குக் காரணம் பெரியோர்களின் ஆசியே என்பது என் கருத்து.’ என்கிறார்.

ஜி.வி.நாராயணசாமி ஐயர் தனது மகன் வழக்கறிஞராவதையே விரும்பினாரெனினும் ஜி.என்.பி-யிடமிருந்த சங்கீத தாகத்தை உணர்ந்தவராய் சங்கீத சிக்ஷையுமளித்தார். அந்நிலையில், அவர் குடியியிருந்த வீட்டில் இன்னொரு பகுதியில் வயலின் வித்வான் மதுரை சுப்ரமணிய ஐயர் குடியேற, அவரிடமும் சில காலம் ஜி.என்.பி சங்கீதம் பயின்றார்.

1928-ஆம் வருடம், மயிலை கபாலீசுவரர் கோயில் வசந்த உத்சவத்தில் ஏற்பாடாகியிருந்த முசிறி சுப்ரமண்ய ஐயரின் கச்சேரி தவிர்க்க முடியாத காரணங்களால் ரத்தாகிவிட, அக்காலத்தில் இசைத் தோண்டில் ஆழ்திருந்த ஏ.கே.இராமசந்திர ஐயரும் மதுரை சுப்ரமணிய ஐயரும், நாராயணசாமி ஐயரிடம் ஜி.என்.பி-யின் கச்சேரிக்கு அனுமதியளிக்க வேண்டினர். நாராயணசாமி ஐயர் முதலில் சிறிது தயங்கினாலும், பின்பு அனுமதியளித்தார். சங்கீத வித்வானாவதையே லட்சியமாய் கொண்டிருந்த ஜி.என்.பி-க்கு இவ்வாய்ப்பு மகிழ்வளித்தாலும், முசிறி சுப்ரமணிய ஐயர் போன்ற ஜாம்பவானின் இடத்தை தன்னால் நிரப்ப முடியமா, என்ற அச்சமும் கூடவேயிருந்தது. ஜி.என்.பி, மானசீக குருவாக உருவகித்திருந்த அரியக்குடி இராமனுஜ ஐயங்காரின் இசையுலகப் பயணம், திருப்பரங்குன்றத்தில் புதுக்கோட்டை தக்ஷிணாமூர்த்தி பிள்ளை ஏற்பாடு செய்திருந்த மதுரை புஷ்பவனத்தின் கச்சேரி ரத்தான பொழுது, அங்கிருந்த இளைஞரான அரியக்குடி இராமானுஜ ஐயங்கார் அவ்வாய்ப்பைப் பயன்படுத்தி புகழின் உச்சியை அடைய வைத்த நிகழ்வை, மதுரை சுப்ரமண்ய ஐயர் எடுத்துரைத்தவுடன், ஜி.என்.பி-யின் தயக்கம் தளர்ந்து கச்சேரிக்குத் தயாரானார். அக்கச்சேரியைக் கேட்ட கே.எஸ்.முத்துராமன் தனது புத்தகத்தில், “ஜி.என்.பி பாடிய பந்துவராளியும், பைரவியும், அடாணாவும் ஒரு மஹாவித்வானின் இசை சாம்ராஜ்யத்திற்கு அடிக்கல் நாட்டின”, என்கிறார்.

ஜி.என்.பி என்று நினைத்ததும் மனதில் முதலில் தோன்றுவது அவரின் கந்தர்வ குரல்தான். ஆழ்ந்த சங்கீத ஞானமும், அதீத கற்பனையும், அக்கற்பனையில் தோன்றுவதையெல்லாம் வெளிக்கொணரக் கூடிய அதிசயக் குரலும் கொண்ட அபூர்வ கலவையே ஜி.என்.பி. இக்கூற்றிற்கு அவர்தன் இளம் வயதில் கொடுத்திருக்கும் ‘வாசுதேவயனி’ கிராம்போன் ரிக்கார்டு ஒன்றே சான்று. வெளியாகி பல ஆண்டுகள் ஆகிவிட்ட நிலையில், இன்றும் மக்களிடையில் பிரபலாமாக இருக்கும் இப்பாடலை வர்ணிக்க வார்த்தையில்லை. கல்யாணி இராகம் ஒரு பிரவாகம் போன்றது. அதன் முழு ஸ்வரூபமும் பல மணி நேரம் பாடினால் கூட முழுமையாய்க் கொண்டு வருவது துர்லபம். பத்து நிமிடத்திற்குள், ஒரு மின்னல் வேக ஆலாபனை, மத்யம கால கீர்த்தனை, ஸ்வர ப்ரஸ்தாரம் எல்லாம் பாடி, கேட்பவர் மனதில் நிறைவை ஏற்படுத்தியிருக்கும் ஜி.என்.பி-யின் அந்த ஒரு வெளியீடே அவரின் இசையாற்றலுக்கு தக்கச் சான்று.

இன்று கேட்கக் கிடைக்கும் ஜி.என்.பி-யின் கச்சேரிகளை பலமுறை அலுக்காமல் கேட்டிருப்பவன் என்னும் முறையில், அவரது கச்சேரியைப் பற்றிய சில குறிப்புகள் பின் வருமாறு. கச்சேரிகளில் ‘களை கட்டுதல்’ என்றொரு பதம் உண்டு. அதை விளக்க முயல்வது வீண் முயற்சி. அதன் பொருள் உணர ஜி.என்.பி-யின் கச்சேரியின் முதல் உருப்படியைக் கேட்டால் போதும். அவரது கச்சேரிகளில் இன்று நமக்கு அதிகம் கேட்கக் கிடைப்பது அவரது கடைசி 10 வருட வாழ்வில் பாடிய கச்சேரிகளே. அவற்றை மட்டும் ஆராய்ந்தால், விறுவிறுப்பான வர்ணம் அல்லது ‘யோசனா’, ‘தெலிசி ராம’ போன்ற மின்னல் வேகக் கீர்த்தனை அல்லது ‘வாதாபி கணபதிம்’ போன்ற மத்யம காலக் கீர்த்தனை, அல்லது சஹானா போன்ற ரக்தி ராகத்தில் அமைந்த ‘ஈ வசுதா நீவண்டி’ போன்ற கீர்த்தனை, என்று பல வகைகளில் கச்சேரி தொடங்கும். எப்படித் தொடங்கினும் கச்சேரியைக் களை கட்டும்படிச் செய்வது அவரது தனிச் சிறப்பாகும்.

அரியக்குடி இராமனுஜ ஐயங்காரின் பத்ததியின் படி மத்யம காலக் கீர்த்தனங்களே ஜி.என்.பி-யின் கச்சேரிகளில் நிறைந்திருக்கும். சவுக்க கால கீர்த்தனங்களும் கச்சேரியின் விறுவிறுப்பை குறைத்திடா வண்ணம் இடம் பெறும். ஜி.என்பி-யின் கற்பனையைப் பறைசாற்றும் வகையில் ஒரே இராகத்தின் ஆலாபனை கச்சேரிக்கு கச்சேரி அல்லது அவர் பாடும் கீர்த்தனத்திற்குக் கீர்த்தனம் மாறுபடும். அவரது ஆலாபனைகள் இரசிகரைக் குழப்பாமல், முதல் பிடியிலேயே இராக ஸ்வரூபத்தை தெளிவாகக் காட்டிவிடும். பல பிரபலமான இராகங்களில் புதிதாய் சில பிரயோகங்கள் பாடியிருப்பதும் (உ.தா கல்யாணி, காம்போஜி ராக ஆலாபனைகள்), அந்நாளில் புழக்கத்திலில்லா இராகங்களை புழக்கத்திற்கு கொண்டு வந்திருப்பதும் (உ.தா: மாளவி, செஞ்சு காம்போஜி, காபி நாராயணி, டக்கா, தீபகம்) ஜி.என்.பி-யின் பல இசைத் தொண்டுகளுள் குறிப்பிடத்தக்கவை. வாழ்நாள் முழுவதும் தன்னையொரு மாணவனாகவே கருதிக் கொண்ட ஜி.என்.பி, தனது கடைசி காலம் வரை புதிய கீர்த்தனங்கள் கற்றபடியிருந்தார். ‘சோபில்லு’, ‘சரஸ சாம தான’, ‘மறுகேலரா’, ‘தாமதமேன்’, ‘ப்ரோசேவா’, ‘மா ரமணன்’ போன்ற பாடல்களைப் பிரபலப் படுத்தியதுடன், பல கீர்த்தனங்களில் நிரவல், கல்பனை ஸ்வரம் பாடுவதிலும் பல புதுமைகள் புரிந்துள்ளார். உதாரணமாக, ‘ ஸ்ர் சுப்ரமண்யாய நமஸ்தே’ பாடலில் பெரும்பான்மையானவர்கள் நிரவலுக்கு எடுத்துக் கொள்ளும் இடம் ‘வாசவாதி சகல தேவ’ என்பதாகும். ஜி.என்.பி-யின் நுண்ணறிவு ‘தாபத்ரய ஹரண’ என்னும் இடத்தில் ‘தா பா’ என்னும் ஸ்வராக்ஷரப் பிரயோகம் ஒளிந்திருப்பதைவுணர்ந்திருக்கிறது. இதே போல ‘மீனாக்ஷி மேமுதம்’, ‘நிதி சால சுகமா’ போன்ற பாடல் நிரவல்களிலும் ஜி.என்.பி-யின் கற்பனைத் திறன் உள்ளங்கை நெல்லிக்கனி. கல்பனை ஸ்வரங்கள் பாட அவர் தேர்ந்தெடுக்கும் இடத்தின் பொருத்தம் பலரின் பாராட்டைப் பெற்றவொன்று. ஜி.என்.பி-யின் சங்கீதத்தில் லயத்தில் உறுதியான பிடியிருப்பினும், ஸ்வரம் பாடும் பொழுது சர்வ லகு முறையையே பின்பற்றப் பட்டு இராக பாவம் கெடா வண்ணம் கவனமாகக் கையாளப்பட்டிருக்கும்.

ஜி.என்.பி-யின் இசையுலகிற்குப் பல புதிய பாதைகளை அமைத்துக் கொடுத்திருப்பினும், அவற்றுள் குறிப்பிடத்தக்கது ‘ஸ்ருதி பேதம்’ அல்லது ‘கிரஹ பேதம்’ ஆகும். நமது நாட்டின் இசை வரலாற்றைப் பார்க்கும் பொழுது ஒரு தாய் இராகத்தின் கிரஹ பேதத்திலிருந்து பிறந்தவையே பல இராகங்கள் என்று இலக்கியங்களின் மூலம் தெரிய வருகிறது. காலப் போக்கில் வழக்கொழிந்து போன இம்முறையைக் கச்சேரியில் ஜி.என்.பி பிரயோகித்த பொழுது பலத்த எதிர்ப்பு கிளம்பியது. அதனைத் தொடர்ந்து, ஜி.என்.பி-யின் செயலில் தகுந்த நியாயம் இருப்பதாக முத்தையா பாகவதர் தலைமையில் குழுமியிருந்த அறிஞர் குழு முடிவு கூறியது. ஓர் ராகத்தில் ‘ஸ்ருதி பேதம்’ செய்யும் பொழுது அதுவரை உருவாக்கிய பாவம் கெடாமல் இருப்பது அவசியம். இக்கம்பி மேல் நடக்கும் வித்தையில் தேர்ச்சி பெற்ற முதல் கலைஞர் ஜி.என்.பி எனலாம்.

ஜி.என்.பி-யின் கச்சேரிகளில் பிரதான உருப்படியாக ‘ராகம் தானம் பல்லவி’ பெரும்பாலும் இடம் பெறும். பெரும்பாலும் இப்பகுதிக்கு முன் ‘நெனருஞ்சினானு’, ‘விடஜால’, ‘ராமசந்திரம் பாவயாமி’ போன்ற அதி துரித கீர்த்தனை இடம் பெறும். கச்சேரி களை கட்டி, குரலும் நல்ல பதத்தை அடைந்திருக்கும் நிலையில், ஜி.என்.பி பல பகுதிகளாய் பிரித்துக் கொண்டு ஒரு இராகத்தை ஆலாபனம் செய்வது வழக்கம்.

ஓவியர், தான் வரையப் போகும் விஷயத்தை சில கீற்றுகளாய் முதலில் நிரப்புவது போல, விஸ்தரிக்கப்படும் இராகத்தின் ஸ்வரூபம் சில கீற்றுகளில் காட்டப்படும். இரண்டாம் கட்ட ஆலாபனையில் மந்திர ஸ்தாயியில் உள்ள பிரயோகங்களில் கவனம் செலுத்தப்பட்ட, நாதஸ்வரப் பாணியில் பல அழகிய ஸ்வரக் கோர்வைகள் கோக்கப்படும். மூன்றாம் கட்டமாக தார ஸ்தாயிப் பிரயோகங்கள் இடம் பெறும். அவரது சங்கீத வாழ்வின் உச்சியில் இருந்த சமயத்தில் தார ஸ்தாயி தைவதம், நிஷாதம் போன்ற எட்டாக் கனிகளைக்கூட எட்டிப்பிடிக்கும் அற்புதக் குரலாய் அவர் குரல் விளங்கியதென்று அவர் கச்சேரிகளைக் கேட்ட பலர் கூறுகின்றனர். தார ஸ்தாயி ப்ரயோகங்களைத் தொடர்ந்து குரலை முதலில் பம்பரமாய் சுழலவிட்டு, அதன் பின் ராட்டினமாய் மூன்று ஸ்தாயிகளிலும் சுழலவிட்டு, கடைசியில் ஓர் சூறாவளி போல் ராகத்தின் பல இடங்களில் சஞ்சரித்து கேட்பவர் மனதில், அந்த ராகத்தில் பாட இனி ஒன்றுமில்லை என்னும் நிறைவு ஏற்படும்படியான சூழலை உருவாக்கிவிடும். குறைந்த பட்சம் 40 நிமிட ஆலாபனைக்குப் பின் விஸ்தாரமான தானமும் அதன் பின் பல்லவியும் பாடுவார். பல்லவிக்கு எடுத்துக் கொள்ளும் இராகங்களில் கல்யாணி, தோடி, காம்போஜி, பைரவி போன்ற கன இராகங்கள், தேவ மனோஹரி, சஹானா, ஆந்தோளிகா போன்ற அதிகம் பாடப்படாத இராகங்கள் என்று பல வகைகளில் பாடியிருக்கிறார். பல்லவியமைப்பும் 2 களை, 4 களை போன்ற கடினமான அமைப்பில் பாடியிருப்பினும் பல ஒரு களை பல்லவிகளும் பாடியிருக்கிறார். ஆலாபனை, தானம், ஸ்வரப்ரஸ்தாரம் அனைத்துமே இராக ஸ்வரூபத்தை வெளிக் கொணரும் பொருட்டேயிருக்கும். பல்லவிக்கு ஸ்வரம் பாடும்பொழுது வரும் இராகமாலிகை ஸ்வரங்களுக்கு இரசிகர்களிடையில் அதீத வரவேற்பிருந்தது.

ஜி.என்.பி கச்சேரிகளில், பல்லவியைத் தொடர்ந்து வரும் பாடல்களுக்கு மிகுந்த எதிர்பார்ப்பிருந்தது. பல இராகங்களில் அழகிய படப்பிடிப்பாய் விளங்கும் விருத்தங்கள், ஸ்லோகங்கள் தவிர அவரே மெட்டமைத்த ‘திக்குத் தெரியாத காட்டில்’, ‘சொன்னதைச் செய்திட சாகசமா’, போன்ற துக்கடாக்கள் இடம் பெறும், கச்சேரி முடியும் பொழுது பாமரரும் பண்டிதரும் மன நிறைவுடன் செல்வதென்பதுறுதி.

நல்ல சாரீரமும் கவர்ச்சியான முகவெட்டும் கொண்டிருந்த ஜி.என்.பி, திரைப்படத்துறையில் ‘சகுந்தலை’, ‘ருக்மாங்கதன்’, ‘பாமா விஜயம்’, ‘உதயணன் வாசவதத்தா’ போன்ற திரைப்படங்களில் நடித்தும் பாடியும் பெரும் பிராபல்யம் அடைந்தார். இவரது வாழ்வில் பல கௌரவங்களைப் பெற்றிருப்பினும் 1958-ஆம் வருடம் சங்கீத கலாநிதி பட்டத்தை இவருக்கு வழங்கி மியூசிக் அகாடெமி பெருமை தேடிக் கொண்டது. வாகேயக்காரராய் ஜி.என்.பி இசைக்கு ஆற்றிய தொண்டு அளப்பெரியதாகும். ‘சிவ சக்தி’, ‘அம்ருத பேஹாக்’ போன்ற அரிய இராகங்களிலிம், பிரபலமான இராகங்களில் சில அரிய பிரயோகங்கள் உபயோகித்தும், மிஸ்ர ஜம்பை போன்ற சுட்பமான தாள அமைப்பிலும் அவர் அமைத்திருக்கும் கீர்த்தனங்கள் இன்று பரவலாய் பாடப்படுகின்றன. ஜி.என்.பி, பாடகராக மட்டுமல்லாமல் சங்கீத ஆச்சாரியராகவும் மிகவும் பிரபலமாக இருந்தவராவார். அவரது பாணியை நிலை நிறுத்தும் வண்ணம் எம்.எல்.வி, திருச்சூர் இராமசந்திரன், தஞ்சாவூர் எஸ், கல்யாணராமன் போன்ற சிஷ்யர்களை இசையுலகிற்குத் தந்த பெருமையும் ஜி.என்.பி-யைச் சேரும். பாடகராய், வாகேயக்காரராய், குருவாய், நடிகராய் பல சாதனை புரிந்த ஜி.என்.பி-யின் வாழ்க்கை 55 வருட காலம் மட்டுமேயிருந்தது இசையுலகின் துர்பாக்யம் ஆகும்.

Advertisements

Read Full Post »

2006-ல் விகடன் பிரசுரத்தில் வெளியான ஜி.என்.பி பற்றிய எனது புத்தகம், இசையுலக இளவரசர் ஜி.என்.பி-யின் ஆங்கில மொழிபெயர்ப்பு மின் புத்தகமாக வெளியாகியுள்ளது.

வெளியிட்டுள்ல ஸ்ருதி பத்திரிகையினருக்கும், மொழிபெயர்த்துள்ள ராம்நாராயணுக்கும் நன்றிகள்.

புத்தகத்தை வாங்க: http://sruti.com/index.php?main_page=product_info&cPath=2&products_id=331

Read Full Post »

ஜி.என்.பி கிருதிகள் வரிசையில் வெகு நாள் கழித்து மூன்றாவது பாடலை இன்றுதான் வெளியிட முடிகிறது.

பல வேலைகளில் மாட்டிக் கொண்டிருப்பதால் இம் முறை தமிழிலும் கிருதி பற்றி எழுத முடியவில்லை.

சிந்துஜாவின் பாட்டையும், பாடல் பற்றிய என் குறிப்பையும் இங்கு கேட்கலாம்/படிக்கலாம்.

http://octaves.blogspot.com/2010/09/celebrating-gnb-3-nee-padame-gathi-in.html

வரும் வாரங்களில் ஒரு கிருதிக்கும் அடுத்த கிருதிக்கும் உள்ல லீட் டைமை குறைக்க நினைத்துள்ளோம். ஜனவரிக்குள் சிந்துஜாவுக்கு தெரிந்த பாடல்கள் அனைத்தையும் வலையேற்ற திட்டம்.

முந்தைய பாடல்கள்: https://carnaticmusicreview.wordpress.com/2010/05/21/gnb-kritis-nee-daya-varnam/ & https://carnaticmusicreview.wordpress.com/2010/04/12/gnb-kritis-srichakra/

பார்ப்போம்.

Read Full Post »

ஜி.என்.பி நூற்றாண்டு ஆர்பாட்டங்கள் (அர்த்தம் புரிந்துதான் இந்தப் பிரயோகம்) முடிந்து மாதங்கள் கடந்த நிலையில் கந்தர்வ கானம் பற்றி கிரிதரனின் விமர்சனம் ஒரு Pleasant Surprise.

இன்னும் சில வாரங்கள் நேரம் இருந்திருப்பின், பிழைகளை இன்னும் கவனமாகக் களைந்திருக்கலாம். நிறைய புகைப்படங்களை பதிப்பித்த போதும், பெரும்பாலானவற்றுக்கு கேப்ஷன் எழுதாதது பெரும் குறைதான்.

அடுத்த எடிஷனில் திருத்தலாம் என்றெல்லாம் கூறப்போவதில்லை. இந்த எடிஷனே விற்றுத் தீரும் என்று தோன்றவில்லை.

கிரிதரனின் கட்டுரை இங்கு.

Related Posts: https://carnaticmusicreview.wordpress.com/2009/12/31/gnb-centenary-2/ & https://carnaticmusicreview.wordpress.com/2010/04/03/kalidas-review/

Read Full Post »

சிந்துஜாவுடன் இணைந்தளிக்கும் ஜி.என்.பி கிருதிகள் வரிசையில் இது இரண்டாவது பாடல்.

எனக்கு மிகவும் பிடித்த ராகங்களுள் ஒன்று ஆந்தோளிகா. கரஹரப்ரியாவின் ஜன்ய ராகமான இந்த ராகத்தின் ஆரோஹணத்திலும் அவரோஹணத்திலும் ஸ்வரங்களின் எண்ணிக்கை ஒன்றாக அமைந்த போதும், இதன் scale asymmetric-ஆக அமைந்துள்ளது. தியாகராஜரின் ‘ராக ஸுதா ரஸ’, இந்த ராகத்தில் அமைந்துள்ள கிருதிகளுள் பிரபலமான ஒன்று.

தியாகராஜர், கிருதியின் முதல் பிரயோகத்திலேயே ராகத்தின் ஜீவனை வெளிப்படுத்துகிறார். அதன் அடிப்படையில் அமைந்துள்ள ஜி.என்.பி-யின் வர்ணம் புதிய பரிமாணங்களையும் வெளிக் கொணர்ந்துள்ளது.

வர்ணத்தைப் பற்றி பார்ப்பதற்கும், ஜி.என்.பி-யின் ஆந்தோளிகாவைப் பற்றி சில வார்த்தைகள்.

ஜி.என்.பி-யின் விருப்பத்துக்குரிய ராகங்களில் பல கரஹரப்ரியா ஜன்யமாக அமைந்துள்ளன. ஆபோகி, ரீதிகௌளை, ஆந்தோளிகா, ஜெயமனோஹரி போன்ற ராகங்களை விரிவாகப் பாடியுள்ளார். அவர் கரஹரப்ரியாவை அதிகம் பாடாதது வியப்புக்குரியது.

இன்று கேட்கக் கிடைக்கும் ஆந்தோளிகாவின் அமைப்பை ஏற்படுத்திக் கொடுத்தவ்ர் ஜி.என்.பி-தான் என்பது பரவலான கருத்து. (நாயினாப் பிள்ளைக்கும் முத்தையா பாகவதருக்கும் கூட ஆந்தோளிகா மிகவும் உகந்த ராகம் என்று எஸ்.ராஜம் ஒரு முறை கூறினார்.)

ஜி.என்.பி-யின் 81-வது பிறந்த நாள் அன்று டி.எம்.தியாகராஜn, தஞ்சாவூரில் ஜி.என்.பி செய்த முதல் கச்சேரியைப் பற்றி விரிவாகப் பேசினார். சினிமாவில் நடித்திருந்த ஜி.என்.பி-யை அக் கால தஞ்சாவூர் ரசிகர்கள் ஏளனமாய்ப் பார்த்தனராம். ஜி.என்.பி அன்று பாடிய ஆந்தோளிகா, அவர்களது எண்னங்களை மாற்றிப் போட்டதாம். அவர்கள் அதுவரை கேட்டிராத ராகத்தில், அரிய பல கோவைகள் அநாயாசமாகப் பாடிய விதத்தை டி.எம்.டி கூறியது என் ஆழ் மனதில் பதிந்தது. பின்னாளில் ஜி.என்.பி-யைப் பற்றி நூலெழுதிய போது, இந் நிகழ்ச்சியைக் கொண்டே நூலைத் தொடங்கினேன்.

படே குலாம் அலி கான், ஜி.என்.பி-யின் ஆந்தோளிகாவுக்கு ரசிகர். ஜி.என்.பி பாடியதைக் கேட்ட பின் அவரும் தன் கச்சேரிகளில் இந்த ராகத்தைப் பாட ஆரம்பித்தார். (ஜி.என்.பி-யும் தன் பங்கிற்கு உஸ்தாதிடமிருந்து காவதியைப் பெற்று தென்னகத்தில் புகுத்தினார். இந்த ராகத்தில் ஒரு வர்ணமும் செய்துள்ளார்.)

ஜி.என்.பி பாடிய சில ஆந்தோளிகா-கள் இன்றும் நம்மிடையே கிடைக்கின்றன. குறிப்பாக திருவையாற்றில் லால்குடி ஜெயராமனும், உமையாள்புரம் சிவராமனும் சேர்ந்து வாசித்திருக்கும் கச்சேரியில் ஜி.என்.பி பாடியுள்ள ஆந்தோளிகா அற்புதமான ஒன்று. அந் நாளில் நேஷனல் ஒலிபரப்பான கச்சேரி அது. (லால்குடி-முருகபூபதி வாசித்துள்ள கச்சேரியில் இருக்கும் ஆந்தோளிகாவும் சிறப்பான ஒன்று).

சரி! வர்ணத்துக்கு வருவோம்!

“வர்ணங்கள் பயிற்சிக்குரிய உருப்படிகள். கச்சேரிகளில் குரல் பதமடைய வேண்டிப் பாடப்படும் உருப்படிகள்.”, என்று பரவலான கருத்துகள் உண்டு. சில எலிமெண்ட்ரி ஸ்கூல் வர்ணங்கள் வேண்டுமானால் இந்தக் கருத்துகளுடன் பொருந்தி வரும். பல சமயங்களில், ஒரு ராகத்தின் பல அழகிய பரிமாணங்களை வெளிப்படுத்த உதவும் சிறந்த கருவிகளாக வர்ணங்கள் இருக்கின்றன. இன்னும் சொல்லப் போனால், சில ராகங்களில் அமைந்துள்ள வர்ணங்கள்தான் அந்த ராகத்தில் உள்ள மிகச் சிறந்த உருப்படியாக அமைகின்றன. உதாரணமாக பைரவி வர்ணத்தையும், நாட்டைக்குறிஞ்சி வர்ணத்தையும் கூறலாம். ஜி.என்.பி-யின் வர்ணங்கள் ஒவ்வொன்றும் முத்தும் மாணிக்கமும் போல மிளிர்பவை. குறிப்பாக ஆந்தோளிகா, காவதி, கதனகுதூகலம் ஆகிய ராகங்களில் அமைந்துள்ள வர்ணங்கள், அந்த ராகங்களில் மறைந்திருந்த பரிமாணங்களை வெளிக் கொணர்பவை.

ஜி.என்.பி-யின் வர்ணங்களுள் மிகப் பிரபலமானது ஆந்தோளிகா வர்ணமே. மற்ற வர்ணங்களை ஜி.என்.பி ஸ்கூல் பாடகர்களே பாடுகின்றனர். இந்த வர்ணம், மற்ற பாணி பாடகர்களிடையிலும் கூட பிரபலமாக உள்ளது. டி.கே.ஜெயராமனின் version-ஏ என்னைப் பொறுத்த வரை சிறப்பானது.

ஆதி தாளத்தில் அமைந்துள்ள இந்த விறுவிறுப்பான வர்ணம், ஜி.என்.பி-யின் இஷ்ட தெய்வமான ‘நாதரூபசுந்தரி’-யின் மேல் அமைந்துள்ளது. “பொதுவாக சிவனைத்தான் நாத ருபமாகக் குறிப்பது வழக்கம். ’நாத தனுமனிஷம் சங்கரம்’ என்கிறார் தியாகராஜர். ஜி.என்.பி-யின் ‘நாதரூபசுந்தரி’ என்ற உருவகம் தனித்துவம் வாய்ந்தது.”, என்கிறார் டாக்டர் எஸ்.ஏ.கே.துர்கா.

இந்த வர்ணத்தில் பல அழகிய ஸ்வரக் கோவைகளை வெளிப்படுத்தியுள்ளார் ஜி.என்.பி.

ரி ம ப நாதரூப
ம ப நி ஸ நாதரூப
ரி ம ரி ஸ நாதரூப

போன்ற பொருத்தங்கள், ஜி.என்.பி-யின் கல்பனை ஸ்வரங்களில் காணக் கிடைக்கும் பொருத்தங்களை ஒத்து அமைந்துள்ளது.
மூன்றாவது சிட்டை ஸ்வரத்தில் ஷட்ஜமும், பஞ்சமும் நீங்கலாக வரும் பிரயோகம் (ரிரிம நிநிரி மமனி ரிரிம நிரிரிம) பெரும்பாலும் சுத்த ஸ்வரங்களாகவே அமைந்து, மெற்கத்திய இசையை நினைவு படுத்துகிறது. இன்று மத்யமாவதி போன்ற ராகங்களிலும் இது போன்ற பிரயோகங்களை கேட்க முடிகிறது.

நெருடலான கணக்கு வழக்குகளில் ஜி.என்.பி ஈடுபடவில்லை என்ற போதும், பல அழகிய pattern-களை கையாண்டுள்ளார். உதாரணமாக நான்காவது சிட்டை ஸ்வரத்தின் ஒரு பகுதி (ஸநிதமரி நிதமரி தமரி மரி) கோபுச்ச யதியில் அமைந்துள்ளது.

சிந்துஜா வழக்கம் போல நன்றாகப் பாடியிருப்பினும், கேட்பவருக்கு இன்னும் கொஞ்ச நேரம் தொடரக் கூடாதா என்ற எண்ணம் எழாமலிருக்காது. ஜி.என்.பி கச்சேரிகளில் வர்ணம் பாடும் போது, சிட்டை ஸ்வரங்கள் பாடியவுடன், சில ஆவர்த்தங்கள் கல்பனை ஸ்வரமும் பாடுவார். robably a few rounds of spontaneous swarams from Sindhuja would have served as the icing on the cake 🙂

பாடலைக் கேட்க இங்கு செல்லவும்.

இங்கு தரவிறக்கம் செய்து கொள்ளலாம்.

இந்த வரிசையில் முந்தைய பாடல் இங்கு.

Read Full Post »

சிந்துஜாவை இங்கு ஏற்கனெவே அறிமுகம் செய்துள்ளேன்.

சில நாட்களுக்கு முன், “ஜி.என்.பி-யின் நூற்றாண்டில், அவரது பாடல்கள் சிலவற்றைப் பாடி என் வலைப்பூவில் வருடம் முழுவதும் போடலாம் என்று நினைத்துள்ளேன். அவற்றைப் பற்றி எழுத முடியுமா?”, என்று சிந்துஜா கேட்டார். கரும்பு தின்னக் கூலியா வேண்டும்? உடனே ஒப்புக் கொண்டேன்.

முதல் பாடலாய், சிவசக்தி ராகத்தில் அமைந்துள்ள ‘ஸ்ரீ சக்ர ராஜ’ பாடலைப் பாடியுள்ளார். பாடலுக்குள் செல்வதற்கு முன்னால், ஜி.என்.பி என்ற வாக்கேயக்காரரைப் பற்றி ஒரு சிறு அறிமுகம்.

பிரபல வாக்கேயக்காரர்களாய் விளங்கியவர்கள் அதம் கச்சேரி செய்து புகழ் பெற்றவராக இருப்பதில்லை. அப்படி இருந்த ‘மஹா வைத்தியநாத சிவன்’, ‘பட்டிணம் சுப்ரமணிய ஐயர்’, ‘பூச்சி ஸ்ரீநிவாஸ ஐயங்கார்’, ‘ஹரிகேஸநல்லூர் முத்தையா பாகவதர்’ போன்றோர் அடங்கிய elite list-ல் ஜி.என்.பி-க்கும் தனி இடமுண்டு. அவரது கச்சேரிகளைப் போலவே, அவரது பாடல்களும், அறிவுத் திறனும், அழகுணர்ச்சியும் சேர்ந்த அழகிய கலவைகள். சாம்பமூர்த்தி, “ஜி.என்.பி-யின் ப்ரந்த கச்சேரி அனுபவங்களும், அந்த அனுபவங்கள் மூலம் ரசிகர்களுக்கு பிடித்தவை எவை, பிடிக்காதவை எவை என்று உணர்ந்திருப்பதும், அவருடைய கிருதிகளுக்கு அடிப்படையாக அமைந்துள்ளது”, என்கிறார். பல சமயங்களில், அறிவுத் திறனை வெளிக்காட்ட நினைக்கும் போது அது அழகுணர்ச்சிக்கு எதிராக அமைந்துவிடுகிறது. ஜி.என்.பி, தனது கிருதிகளில், ஸ்வராக்ஷரப் பிரயோகங்கள், நெருடலான சிட்ட ஸ்வரங்கள், அது வரை கையாளப்படாத எடுப்புகள், அவர் உருவாக்கிய ராகங்கள், என்று பல அறிவுப் பூர்வமான முயற்சிகளைக் கையாண்ட போதும் அவரது பாடல்களைக் கேட்கும் போது ‘natural’-ஆகவே ஒலிக்கின்றன.

‘இசைக் கனவுகள்’ என்று தன் பாடல்களைக் குறிப்பிடும் ஜி.என்.பி, “எனக்கு சில சமயங்களில் ஸ்வரக் கோவைகள் கண் முன் உருவங்களாய் தெரிவதுண்டு. அவற்றை எழுதி வைத்துக் கொள்வேன். காலப் போக்கில் அவற்றை மறந்தும் விடுவேன். அப்படி மறக்காமல், நிரந்தரமாய் உரு கொடுப்பதற்காகவே அவற்றை கீர்த்தனைகளாக புனைந்தேன். அதன் பின், அவற்ரை சிஷ்யர்களிடம் விட்டுவிடுவேன். நான் அவற்றை திரும்பிப் பார்ப்பதில்லை.”, என்கிறார். ( “அவர் தன் கிருதிகளைப் பாடாமல் விட்டது, சங்கீத உலகத்துக்கு அவர் இழைத்த பெரும் துரோகம்”, என்பார் எஸ்.ராஜம்) அவர் திரும்பிப் பார்க்காத போதும், அவர் இருந்த போது அவருடைய கிருதிகள் சில பிரபலமாய் விளங்கின. அதற்குக் காரணம் அவருடைய சிஷ்யர்கள் டி.ஆர்.பாலசுப்ரமணியமும், எம்.எல்.வசந்தகுமாரியுமே.

ஜி.என்.பி, 250 பாடல்களுக்கு மேல் புனைந்தார் என்று பல குறிப்புகள் கூறுகின்றன. 1948-ல் சுதேசமித்ரன் ஆசிரியர் நீலத்துக்கு ஜி.என்.பி எழுதிய கடிதத்தில், அப்போதே 50 கிருதிகளுக்கு மேல் இருப்பதை அவரே குறிப்பிட்டுள்ளார். எம்.எல்.வி ஒரு நேர்காணலில், அவர் 1950-களில்தான் நிறைய பாடல்கள் புனைந்தார் என்கிறார். ’கான பாஸ்கர மணிமாலையில்’ (ஜி.என்.பி பாடல்களின் முதல் தொகுதி) “அவர் இஷ்ட தெய்வம் ராஜராஜேஸ்வரியின் மேல் மட்டுமே நூற்றுக் கணக்கான பாடல்கள் புனைந்துள்ளார்”, என்கிறார் மைசூர் வாசுதேவாச்சாரியார். ஜி.என்.பி பாடல்கள் இது வ்ரை மூன்று தொகுதிகளாக வெளியாயுள்ளன. அவற்றுள், 7 வர்ணங்கள், 73 கிருதிகள், 1 தில்லானா ஆகியவை ஸ்வரப் படுத்தப்பட்டு வெளியிடப்பட்டுள்ளன. அவர் புனைந்தவற்றில், 50 விழுக்காடுக்கு மேல் தொலைந்து விட்ட போது, கிடைக்கின்றன கிருதிகளே அவரின் கற்பனைத் திறனையும், நுண்ணறிவையும் பறை சாற்றுகின்றன.

“Sahithya in Krithis” என்ற கட்டுரையில் “Dikshitar’s kritis are detached and impersonal description and stothras of the hindu panthoen while those of Tyagaraja are records of his personal and emotional experience of God”, என்கிறார் ஜி.என்.பி. ஜி.என்.பி-யின் கிருதிகள் இரு வகையிலும் உள்ளன. அவர் ‘தன்மையில்’ (first person) எழுதிய கீர்த்தனைகள் அனைத்தும் அவரது சொந்த உணர்ச்சிகளையும், அனுபவங்களையும் குறிக்கின்றன என்று சொல்வதற்கில்லை. ஜி.என்.பி-யின் கீர்த்தனைகளின் சாஹித்ய பாவத்தை விட, இசை நயம் பலராலும் போற்றப்பட்டுள்ளது. காவதி, ஆந்தோளிகா, கதனகுதூகலம் போன்ற அரிய ராகங்களிலும், ஹிந்தோளம், வராளி, ரஞ்சனி, யதுகுலகாம்போதி போன்று பிரபல வர்ணங்கள் ஏதும் அமையாத ராகங்களிலும் அமைந்துள்ளன.

அட தாளத்தில் அமைந்திருக்கும் யதுகுல காம்போதி வர்ணத்தைத் தவிர, அனைத்து வர்ணங்களும் ஆதி தாளத்தில் அமைந்துள்ளன. ‘அம்போருஹ’ என்ற ரஞ்சனி வர்ணம் இன்று பிரபலாமடைந்திருக்கிறது.

கதனகுதூகலம் ராகத்தை முதலில் கையாண்டவர் பட்டணம் சுப்ரமணிய ஐயர். அவரது ‘ரகுவம்ஸ ஸுதா’ என்ற கிருதி, மேற்கத்திய இசையை நினைவூட்டும் சங்கதிகள் நிறைந்து, வாத்திய இசைக்கென்றே அமைக்கப்பட்டது போலிருக்கிறது. ஜி.என்.பி-யின் கதனகுதூகல வர்ணம், பல அழகிய கோவைகளுடன், பாடுவதற்கேற்ப அமைந்துள்ளது. விஜயலக்ஷ்மி சுப்ரமணியம் தனது கட்டுரையில், “The popular composition in this raga has virtually been hijacked by the instrumentalists, if I may be permitted to use such a word. GNB’s handling, is beautiful, melodic and quite different from Raghuvamsa Sudha”, என்கிறார்.

மாளவி. செஞ்சு காம்போதி, நாராயணி, கதனகுதூகலம், ஸரஸ்வதி, ரஞ்சனி, தேவ மனோகரி, நளின காந்தி, பூர்ண சந்திரிகா போன்ற கிருதிகள் குறைவாக அமைந்த ராகங்களில் ஜி.என்.பி அமைத்துள்ள கிருதிகளை ‘a welcome addition’, என்று கூறலாம். ரஞ்சனியில் அமைந்த ‘ரஞ்சனி நிரஞ்சனி’ கிருதியும் ஸரஸ்வதி ராகத்தில் அமைந்த ‘ஸரஸ்வதி நமோஸ்துதே’ கிருதியும் நவராத்திரியின் போது அதிகம் கேட்கக் கிடைக்கும் பாடல்களாகக் திகழ்கின்றன. இவை தவிர, ‘வீணாதரி’, ‘ஸாரங்க தரங்கிணி’ போன்று புத்தகங்களில் மட்டுமே இருந்த ராகங்களில் கிருதி அமைத்த பெருமையும் ஜி.என்.பி-க்கு உண்டு.

அரிய ராகங்களிலும், புதிய பிடிகளிலும் கிருதிகள் அமைத்ததைத் தவிர, ஹரிகேசநல்லூர் முத்தையா பாகவதரைப் போல் புதிய ராகங்களை உருவாக்கி, அவற்றிலும் கிருதிகள் அமைத்துள்ளார். ‘அமிர்த பெஹாகும்’, ‘சிவசக்தியும்’ இவரது கண்டுபிடிப்புகளே.

ஜி.என்.பி-யின் சாஹித்யங்களின் விசேஷமான அம்சம் என்று அவரது ஸ்வராக்ஷர பிரயோகங்களைக் கூறலாம். ‘நீ பாதமே கதி’, ‘ஸதா பாலய’, ‘பாத பஜன’ போன்ற கிருதிகளை அழகான ஸ்வராக்ஷரங்களில் தொடங்கியுள்ளார். பல கிருதிகளில் ராகத்தின் பெயர் சாஹித்யத்தில் வரும் வகையிலும் அமைத்துள்ளார். சில கீர்த்தனைகள் சிட்டை ஸ்வரங்களுடன் அமைந்துள்ளன. இச் சிட்டை ஸ்வரங்களில், தாட்டு வரிசை பிரயோகங்கள் கோபுச்ச யதி போன்ற கோவைகளை அழகுற பயன்படுத்தியுள்ளார்.

ஜி.என்.பி, மற்ற வாக்கேயக்காரர்கள் போல முத்திரை வைக்கவில்லை என்பது பரவலான கருத்து. ஆனால், ஒரு நிகழ்ச்சியில் விதுஷி எஸ்.ஏ.கே.துர்கா, “அவர் பாடல்களே அவருடைய முத்திரைதான். அந்தப் பாடல்களைக் கேட்டாலே அவை ஜி.என்.பி பாடல்கள்தான் என்று சந்தேகமின்றி தெரிந்து கொள்ளும் வகையில் இருக்கின்றன. அதை மீறி தனியாக ஒரு முத்திரை எதற்கு?”, என்று அழகாக விளக்கினார்.

ஜி.என்.பி கிருதிகளைப் பற்றிய இந்த அறிமுகத்துடன், இந்த வரிசையில் மலர்ந்திருக்கும் முதல் பாடலைப் பார்ப்போம்.

ஜி.என்.பி உருவாக்கிய ராகங்களுள் ஒன்றான சிவசக்தி, கரஹரப்ரியாவின் ஜன்யம். அரோஹணத்தில் ‘ஸ,க,ம,த’ என்ற நான்கு ஸ்வரங்களும், அவரோஹணத்தில் ‘ஸ,நி,த,ம,க’ என்ற ஐந்து ஸ்வரங்களுடன் அமைந்துள்ள ராகம்.

ஒரு ராகத்தில், அரோஹணத்திலும் அவரோஹணத்திலும் குறைந்த பட்சம் ஐந்து ஸ்வரங்களாவது இருக்க வேண்டும் என்றொரு லட்சணம் உண்டு. பாலமுரளிகிருஷ்ணா இந்த லட்சணத்தை உடைத்து, ‘மஹத்தி’ போன்ற ராகங்களை உருவாக்கிய போது பெரும் எதிர்ப்பை சந்திக்க நேரிட்டது. ஆனால், இதையே ஜி.என்.பி செய்த போது பெரிய எதிர்ப்பொன்றும் கிளம்பவில்லை. அதற்கு முக்கிய காரணம், அவரது கிருதியைக் கேட்கும் போது, unconventional-ஆன ஒன்றை கேட்கிறோம் என்ற உணர்வு சற்றும் ஏற்படாமல் இருப்பதே.

இந்த  ராகத்தை ஜி.என்.பி எப்படி அமைத்தார் என்பதை வீணை எஸ்.பாலசந்தர் ஒருமுறை விளக்கினார். “சிவசக்தி ராகம் ‘ஸ்ரீ சக்கரத்தை’ ஒத்து அமைக்கப்பட்டுள்ளது. ஸ்ரீ சக்கரத்தின் ஒன்பது முகங்களில் நான்கு சிவனையும், ஐந்து சக்தியையும் குறிப்பது போல, சிவசக்தி ராகத்தின் அரோஹணத்தில் நான்கு ஸ்வரங்கள் சிவனையும், அவரோஹணத்தின் ஐந்து ஸ்வரங்கள் சக்தியையும் குறிக்கின்றன”. கிருதியில் வரும் ‘ஸ்ரீ சக்ர ராஜ நிலையே’, ‘சிவசக்தி ஐக்ய ரூபிணி’ போன்ற வரிகள் இந்த கூற்றை நிறுவும் வகையில் அமைந்துள்ளன.

மத்யம கால கிருதி என்ற போதும், இந்தப் பாடலை விஸ்தாரமாய்ப் பாடும் பாடல்களுக்கு இடையில் வரும் துரித காலத்திலும் கேட்டிருக்கிறேன். அனு பல்லவியின் அமைப்பு, துரித காலத்தில் பல சங்கதிகள் பாடத் தோதாய் அமைந்துள்ளது. இந்த ராகம் விஸ்தாரமாய் பாடுவதற்கும் நிறைய வாய்ப்பளிப்பதாய் அமைந்துள்ளது. நெஞ்சை உருக்கும் ‘hindholamish phrases’ நிறைந்த பூர்வாங்கமும், உற்சாகமான ‘aboghiyish phrases’ நிறைந்த உத்தராங்கமும், கலந்த ஒரு அரிய கலவையாக இந்த ராகம் (வரமு என்ற இதற்கு மிக நெருங்கிய ராகமும்) அமைந்துள்ளது.

‘த்விதியாக்ஷரப் ப்ராஸம்’ என்பது கிருதியின் சங்கீதத் தன்மையை மேம்படுத்தும் விஷயம். அதாவது வரிகளில் தொடங்கும் வார்த்தைகளில் இரண்டாவது எழுத்து rhyming-ஆய் அமைவதை இப்படிக் குறிப்பதுண்டு. இந்தப் பாடலின் அனு பல்லவியிலும் சரணத்திலும், எல்லா வரிகளிலுமே ‘த்விதியாக்ஷரப் ப்ராஸம்’ அமைந்திருப்பது சிறப்பாகும். வித்வான் டி.ஆர்.சுப்ரமணியம், “It is uncommon to find a composer using ‘dvitIyAkshara prAsam’ on all lines of a compositions. In GNB’s case it is a regular feature”, என்கிறார்.

எம்.எல்.வி வெளியிட்டு பிரபலமான குரு வந்தனம் என்ற கிராமஃபோன் ரிக்கார்டில் இந்தப் பாடல் இடம் பெற்றுள்ளது. இப்போது, சுதா ரகுநாதன் நிறைய கச்சேரிகளில் இந்த ராகத்தையும் பாடலையும் விஸ்தாரமாகப் பாடி வருகிறார். இதே ராகத்தில், ‘வினுத பாலினி’ என்ற பாடலையும் ஜி.என்.பி அமைத்துள்ளார். காலப் போக்கில், அந்தப் பாடலும், ‘ஸ்ரீ சக்ர ராஜ’ அடைந்துள்ள பிராபல்யத்தை அடையும் என்று நம்புவோம்.

இதே மேட்ட்ரை ஆங்கிலத்தில் படிக்கவும் பாடலைக் கேட்கவும் இங்கு க்ளிக்கவும்.

பாடலை இங்கு தரவிறக்கம் செய்து கொள்ளலாம்.

Read Full Post »

மிருதங்க வித்வானும், மிருதங்க மாமேதை பழநி சுப்ரமண்ய பிள்ளையின் சீடருமான திரு.கே.எஸ்.காளிதாஸ் அவர்களின் கந்தர்வ கானத்தைப் பற்றிய விமர்சனத்தை இங்கு படிக்கலாம்.

http://varalaaru.com/Default.asp?articleid=981

Read Full Post »

Older Posts »